República Independente de Toutelle

PECHADO POR MUDANZA

2006-04-24T12:57:00.000+02:00

MÚDOME. CREO QUE XA VAI SENDO HORA DE DEIXAR ESTE BLOG. GRAZAS.

Chegaremos a eso?

2005-11-01T21:33:00.000+01:00

Hoxe andei por Chaves de visita. Tratabase da "Féria de Santos", enorme mercado que dura varios días.
Paseando por ali, de socato ouvin música india, e dirixin a mirada cara alí. Eran catro homes, indios, se non puros, alomenos sí descendentes de indios, que ataviados con roupas semellantes ás que viamos nos filmes do oeste, bailaban ao son da música unha especie de danza que supoño que sería algo semellante ás que bailaban os seus antergos.
Caeuseme a alma aos pés, e comecei a chorar. Porque pensaba que toda unha civilización, unha forma de vida, unha cultura, varias linguas, todo o que significou algún día a raza nativa de América (neste caso do Norte) era nese momento unha atracción de feira. Toda a xente miraba como eles bailaban e eu mireilles aos ollos e pareceume ver a súa impotencia, a súa frustración por ter que usar a súa cultura para exibila e deturpala dese xeito para gañar o pan. Eles, cuxos antepasados algún día foron tan sabios e poderosos, agora poñían a súa dignidade alí á vista de todos.
Choraba de rabia por velos ali, facendo da súa cultura e dos seus orixes un espectáculo para morbosos e curiosos.
Choraba de rabia porque imaxinei a algún galego facendo o mesmo nun futuro, paseando as muiñeiras, as pandereteiras, a nosa música polas feiras como se se tratara dunha cousa extrana, dunha curiosidade, dun monstro nunca visto.

E levamos camiño deso.

NON.

2005-10-14T16:26:00.000+02:00

Si dixese que sí,
que todo está moi ben,
que o mundo está moi bon,
que cada quen é cada quen...
Conformidá.
Ademiración...
Calar, calar, calar,
e moita precaución.
Si dixese que acaso
as cousas son esí,
porque sí,
veleí,
e non lle demos voltas.
(Si aquil está enriba
i aquil outro debaixo
é por culpa da vida.
Si algunhos van de porta en porta
cun saco de cinza ás costas
é porque son uns docas.)
Si dixera que sí...
Entón sería o intre
de falar seriamente
da batalla de froles
nas festas do patrón.

Pero NON.

Celso Emilio Ferreiro.
Longa noite de pedra.

a vida real

2005-10-04T14:06:00.000+02:00

Unha enrédase coas cousiñas que se lle presentan na vida real e deixa de existir na vida virtual durante... catro meses!!!!
Sintoo moito se segues o meu blog, en primeiro lugar porque non creo que sexa nada especial como para seguilo, asique se o fás é unha boa faena que te deixe colgad@ durante tanto tempo; e por outra banda, porque escribir sempre está ben, como terapia, como divertimento, como pasatempo, pero sobre todo como desafogo.
Tentarei ser máis constante, que é unha das virtudes das que carezo totalmente.

hai que botalos!

2005-05-26T14:25:00.000+02:00

Aqui vos enlazo coa páxina de hai que botalos. Nela podedes descargar as curtametraxes nas que se denuncia a situación da Galiza e aos que así a puxeron.
Nas nosas mans está cambialo. Botémolos.

blog de comentario político

2005-05-10T22:13:00.000+02:00

Convídote a visitar o blog sobre a actualidade política e as eleicións do 19 de xuño que veño de abrir na páxina http://www.eleccionesgallegas.com/
O título do meu blog vén sendo: pesos a catro pesetas, vendo voto barato e nel vou facer, de aquí ás eleicións un percorrido polos acontecementos e promesas eleitorais que se vaian sucedendo. E segundo me vaian parecendo irei calificando aos principais candidatos. Unha vez chegada a xornada de reflexión farei reconto e votarei ao que mellor puntuación acadara.

Non o perdas, ao mellor tamén che orienta a ti!

herdeiro para a herdanza e mulleres kleenex

2005-05-09T17:33:00.000+02:00

Xa temos herdeiro! Anda o poleiro revolucionado coa nova esa de que a Letizia vai ser nai, e con eso, o príncipe vai ter quen lle herde a coroa.

E digo eu que, de ser a tal Letizia unha muller intelixente como se lle supoñía non tería participado nesta farsa absurda. Porque, digo eu, a que muller lle presta ter como papel nesta vida o ser o recipiente para xestar un príncipe e nada máis que eso?
Vendo os telexornais da a sensación de que a Letizia é só eso: un recipiente. Falan da boa nova, de que o príncipe vai ter herdeiro para a coroa e todo eso, e da a sensación de que a coroa só quería unha femia para que lle dera un herdeiro ao príncipe e nada máis. Asique a tal Letizia non deixa de ser un frasco, unha muller utilizada, porque de momento os homes non poden ter fillos e ao príncipe facíalle falta un fillo, polo tanto unha muller, conseguiu a muller e xa lle está a facer de envase para o seu retoño. O colmo do machismo.

Vivan as mulleres florero.

eu non son racista (?)

2005-04-11T20:33:00.000+02:00

A xente que quere expresar o que pensa e, ao mesmo tempo, ratificar o boa persoa que é soe dicir: "eu non son racista, pero..." e engade algunha "xoia" adicada a xitanos, negros, sudamericanos ou xente de Europa do leste, por poñer un exemplo.

Esta mesma mañá, no traballo, tiven que escoitar unha sarta de barbaridades do estilo de "eu non son racista pero mira que hai extranxeiros aqui, que veñen sen traballo e só veñen a mangonear e a vender droga" ou "eu non son racista pero tiñan que poñer remedio a esta xente, que non puderan entrar en España, que se queden no seu pais" etc, etc...

Burradas que se din porque, por un lado, todo o que nos rodea nos incita a pensar asi (reparade senón nos titulares xornalísticos do estilo de "un xoven rumano mata a...", "unha muller de etnia xitana asasina a...", "un marroquí dalle unha paliza a..." e asi sucesivamente, nunca atoparedes un titular que diga: "un español mata a..." ou algo parecido); por outra banda, non acabamos de darnos conta de que se hoxe este estado é o estado que é, débese aos miles e miles de persoas que emigraron a tantos lugares do mundo, onde tiveron que pasar miserias e problemas para poder enviar algún pesiño á casa. Como fan hoxe tantas xentes vidas doutros lugares.

Qué pouca memoria e canta maldade pode chegar a ter o ser humano!

falar a achar

2005-04-06T11:24:00.000+02:00

Esta expresión, usada moito pola costa arousá, vén a dicir algo así como falar sen pensar o que se dí, falar sen sentidiño.

E cantas veces se fala a achar!!! Falar por non estar calado. E canto se mete a zoca por este motivo!

Pídolle a estes elementos que últimamente non paran de falar a achar, sobre todo para a prensa, que deixen de facelo. Máis pensar e menos darlle á lingua.

democracia?

2005-02-20T19:33:00.000+01:00

que sucede nun estado chamado democrático cando o propio goberno do estado se inclina en favor dunha das respostas nun referendo consultivo?
que pasa cando os que se din adalides desa democracia andan a pedir o voto afirmativo para a mal chamada Constitución Europea no mesmísimo día das votacións?

Inda que só sexa por este motivo, eu vou votar NON.

ando a reler o Ideario

2004-12-25T17:38:00.000+01:00

Estes dias ando a reler o "Sempre en Galiza". E cada vez que o releo atopo novas frases e textos que non lembraba ter lido na anterior ocasión, ou nos que non tiña reparado.
Ai vai un para a reflexión.
"Un home que teña fe no ideal que propaga non debe resignarse a morrer sen velo realizado, a non ser que morra en loita polo seu ideal. E ainda direi máis, expóndome a que se dubide das miñas conviccións democráticas: Se o pobo non quixera enterarse do que lle convén e fixese desprezo do remedio que pode salvalo, haberá algún home de fe que deixase de impor ese remedio, ainda pola forza, se dispuxese de poder para tanto? Porque un home de verdadeira fe nos ideais que predica, e con coraxe para remediar as desventuras do pobo, vai cara ao triunfo cando se poida e como se poida"

a vixencia da historia

2004-12-25T17:33:00.000+01:00

"Quen pode, pois, salvar Galiza? Galiza mesma. Como? Cun gran partido político nidiamente galego. E para que? Para que a Nosa Terra conquira o dereito de lexislar para si mesma. E cando contaremos con ese gran partido? Cando os nosos labregos abran os ollos e deixen de votar a quen non comprende a nosa diferenciación."

Sempre en Galiza

Castelao

Estas palabras foron escritas en 1935. Incríbel a vixencia do pensamento do compañeiro Daniel. A vixencia da historia.

xogando coas pensións

2004-12-23T10:02:00.000+01:00

Chegan estas datas e o goberno "reinante", sexa da cor que sexa, tanto monta, monta tanto (ou, como se diría, PSOE e PP a mesma merda é), ponse a augurar a subida das pensións e cacarexalas pola TV, coma se non fose de recibo que as pensións suban cando menos a mesma porcentaxe do IPC. Coma se non fosen subir de non ser porque temos aí ese goberno salvagarda das nosas economías. O PP fartouse de xogar con este tema e agora o PSOE (ao que xa lle coñecemos as mañas de hai anos) volta facer o mesmo.

Enfin, como queira que eu xa terei que facer un plan de pensións se quero cobrar algo cando chegue alá...

victimas do terrorismo

2004-12-15T21:29:00.000+01:00

Hoxe estiven a ver as comparecencias na Comisión do 11-M d@s representantes das víctimas. Para empezar chocoume bastante que un deles fora víctima de ETA e non do 11-M. Que pintaba alí? Pois ir a provocar. Pilar Manjón fixo unha alocución íntegra, sentida, responsable e imparcial, abroncando por igual a uns e outros. Pero Alcaraz só foi alí a atacar aos partidos que a el non lle gustan. Non se supoñía que se ía alí a falar do 11-M e da visión das víctimas dese atentado?
Baste un exemplo: xusto despois da comparecencia de Pilar Manjón, na que en varias ocasións repetiu con bágoas nos ollos que ás víctimas lles gustaría que se deixase de usar a súa dor políticamente, chega Alcaraz e o primeiro que di é que el non tén carné de partido ningún, senón que na carteira leva como único carné as fotos dos familiares que ETA lle asesinou metres amosaba tais fotos. Eso non é utilizar a súa dor?
Que me perdoen, pero eu non o entendo. Eu podo comprender a dor por eses familiares, pero non que os utilice así nunha comisión de investigación que, ademáis, trata dun atentado que non tén nada que ver con el.

Non sei, poida que me equivoque, pero non acabo de entendelo.
Supoñía que víctimas somos todos, pero resulta que hai víctimas de primeira e de segunda. Mesmo pode que de terceira.

debates de andar por casa

2004-12-07T14:23:00.000+01:00

Con esto dos atentados da ETA, anda o puleiro revolucionado, e a xente permítese opinar ata dos temas máis variopintos.

Onte, ademáis día da Constitución, tiven que soportar no traballo unha serie de debates de andar por casa, destes que eu escoito e nos que procuro non participar, polo infructíferos que son. Dúas ou tres persoas que sacan a colación o tema da ETA, e vale, ata aí podemos dar opinións, pero o tema (non sei como) empeza a derivar e recorre case sempre o camiño ETA-Euskadi-Catalunya-Nacionalismo-Independencia con itinerarios varios e cruces múltiples. E a conclusión á que chegan este tipo de tertulianos de pouco caché é case sempre a mesma: "se se queren independizar que se independicen, pero con todas as consecuencias, nada de Seguridade Social, nada de recursos de España" . E con esto xa indican a pouca idea que teñen: acaso non saben que unha inmensa maioría dos recursos do Estado veñen de Euskadi e Catalunya? Acaso pensan que Galiza non podería ser independente cos recursos que ten? Claro que pensan eso, porque os recursos que tén Galiza son pisoteados constantemente, os sectores productivos desmantelados, e á poboación galega fanlle crer que só podemos subsistir grazas ás subvencións de Madrid. E así é como estes tertulianos de pastel conclúen nos seus debates de andar por casa que as Nacións non recoñecidas que forman parte do Estado non serían capaces de vivir sen ese papá Estado.

Típico pensamento do colonizado.

eu son un bicho raro

2004-12-01T18:45:00.000+01:00

Hai veces que penso que a xente que me rodea (no traballo, en clases, na rúa, no ximnasio...) opina de min que son un bicho raro. Porque penso diferente, porque teño as miñas ideas e as defendo, porque penso, escribo e falo galego... PORQUE PENSO! Simplesmente por pensar son un bicho raro. Asi que xa sabes, se queres ser "normal", se queres ser coma os demáis, non penses. Só vive a túa vida conforme cha van ditando, sen protestar, sen opinar, sen dicir, sen pensar. Ti cala, tira para adiante e confórmate co que hai.
Resulta que se participas en política es coma eles (eses monstruos!), e cando algo non gosta, ou non é como a xente pensa que debería ser, entón dicimos que todos os/as políticos/as son iguais e calamos a boca. Que fagan o que lles pete. NÉGOME! Se eu penso que algún/ha político/a non fai algo ben, entón o primeiro que fago é dicilo, despois actuar para cambialo.

Como detesto o conformismo. E o certo é que hai moito ao meu redor.

Nirgendwo in Afrika

2004-11-26T15:57:00.000+01:00

Nirgendwo in Afrika. Este era o título orixinal en alemán da película (en versión orixinal) que fun onte ver ao cine. E gustoume moito. Trata dunha familia xudea que en 1933, tén que emigrar a Kenia para fuxir da política nazi de Hitler. E de como teñen que adaptarse a vivir nunha cultura tan diferente. O filme tiña moitos detalles interesantes moi extrapolables á época actual. Como cando a moza xudea, que en Alemania vivía unha vida acomodada, chega á casa onde van vivir (como colonos granxeiros) e trata co cociñeiro keniata. Ao principio trátao mal, co desprecio típico de quen se cré superior. Ela, que viña de fuxir dun goberno que a trataba con superioridade por crerse dunha raza superior. A contradicción é obvia. Ou cando lle explica á súa filla (branca e loira) que non debe "misturarse" cos nativos, que son doutra raza, diferentes. Tén graza. Ao final do filme, por suposto cambia a súa visión do mundo, chegando a dicir que en África aprendera o importantes que son as diferenzas.

A lección non podía ser mellor: as diferenzas son cultura, engrandécennos e enriquécennos.

2004-11-25T13:33:00.000+01:00

para que remate esta vergonza,
vota o estatuto

novo estatuto

2004-11-25T13:20:00.000+01:00

Acabo de descubrir a páxina web do foro sobre un novo estatuto. Ainda non tiven tempo de mirala polo miudo, pero parece interesante. Temos que tirar por este proxecto. Só un novo estatuto nos pode facer continuar no camiño da soberanía nacional. Se deixamos que agora Euskadi e Catalunya teñan un novo estatuto moito máis achegado ao que é un estatuto de nación e Galiza queda atrás e se arma só dun estatuto como o que temos agora, perderemos o tren da historia e despois será moito máis dificil volverse enganchar.

mar adentro

2004-11-24T20:39:00.000+01:00

Veño de ver a película de Amenabar. Fascinante. Polo que che fai pensar e polo que de galego hai nela. Tén certos aspectos que non me gustaron á hora de tratar a parte máis galega da fita, pero en xeral é xenial. A forma en que se trata o tema da eutanasia sen entrar a xulgar ou discutir sobre ela. A forma en que se contrapón a vida e a morte. Canto chorei! Merece a pena vela, desde logo. Non conto o argumento por dúas razóns: é de sobra coñecido, e non quero adiantar certos detalles. Para quen a viu ou pensa ver: o mellor ao meu modo de ver é a viaxe de Ramón á Coruña. Fai pensar!

Seica non chove a gusto de todos

2004-11-22T20:22:00.000+01:00

Esta mañá escoitei nun "debate" (asi, entre aspas, porque era no medio dun programa do corazón!) que seica a cumbre iberoamericana trouxo desacordos entre o PSOE e o PP. Mira ti por onde! E cando están estes de acordo? Ah! Si! Cando se trata das nacións que forman parte dese estado chamado España (y olé). Entón xuntan forzas e berran todos xuntos: basta ya! O que vén sendo algo así como: nada deso! Porque, digo eu... que lles molestará tanto de que un pobo sen estado queira conseguir autogoberno? Que é o que lles proe cando Galiza pide ser dona das decisións que afectan ao seu futuro? Nada, que así nos vai: reconversión naval, desertización do interior, abandono do campo, a pesca ao carallo e todos tan contentos porque se presenta Don Manuel!

Estamos salvados.

Benvid@s á República Independente de Toutelle

2004-11-21T10:39:00.000+01:00

Eis un novo país.
Unha nova patria de ideas e non de cousas.
Unha nova terra de sentimentos e non de materias.
Eis Toutelle.Buscade Toutelle.
Coñecédeo comigo.